తెలంగాణలోని ఈ గ్రామంలో గ్యాస్ సిలిండర్లకు పోలీసు కాపలా... వీడియో ఇదిగో!

మహబూబ్‌నగర్ జిల్లాలోని పెద్ద ముప్పారం గ్రామంలో ఓ విచిత్ర దృశ్యం ఆవిష్కృతమైంది. ప్రముఖులకో, అత్యంత విలువైన వస్తువులకో కల్పించే తరహాలో.. వంటగ్యాస్ సిలిండర్ల పంపిణీకి పోలీసులు భారీ బందోబస్తు కల్పించారు. దోపిడీ జరగవచ్చన్న భయాల మధ్య సిలిండర్లతో వెళుతున్న వాహనానికి పోలీసు జీపులు ఎస్కార్ట్‌గా వెళ్లడం రాష్ట్రవ్యాప్తంగా చర్చనీయాంశమైంది.

వివరాల్లోకి వెళితే, ఈ వారం పెద్ద ముప్పారం గ్రామంలో గ్యాస్ సిలిండర్లతో వస్తున్న ఆటో రిక్షాకు ముందు, వెనుక పోలీసు జీపులు రక్షణగా వెళ్లాయి. ఇద్దరు సబ్-ఇన్‌స్పెక్టర్ల పర్యవేక్షణలో ఈ పంపిణీ కార్యక్రమం జరిగింది. ప్రతి లబ్ధిదారుడికి సిలిండర్ సురక్షితంగా అందేవరకు అధికారులు ఆటోతో పాటు గ్రామంలోని వీధులన్నీ తిరుగుతూ విధుల్లో ఉన్నారు.

గతంలో గ్యాస్ కొరత ఏర్పడినప్పుడు డెలివరీ వాహనాలను అడ్డగించి సిలిండర్లను బలవంతంగా తీసుకెళ్లిన ఘటనలు చోటుచేసుకున్నాయి. ఈ నేపథ్యంలో, దోపిడీ జరగకుండా, అర్హులైన వారందరికీ సిలిండర్లు చేరేలా చూడాలన్న డీలర్ల అభ్యర్థన మేరకు పోలీసులు ఈ భద్రతను ఏర్పాటు చేశారు. పోలీసుల పహారాలో గ్యాస్ పంపిణీని చూసి గ్రామస్థులు ఆశ్చర్యపోయారు. ఈ ఘటనకు సంబంధించిన చిత్రాలు సామాజిక మాధ్యమాల్లో విస్తృతంగా వ్యాపించడంతో ప్రజల నుంచి మిశ్రమ స్పందన వ్యక్తమవుతోంది. వంట గ్యాస్‌కు కూడా పోలీసు భద్రత కల్పించాల్సిన దుస్థితి వచ్చిందా అని కొందరు ప్రశ్నిస్తుండగా, అక్రమాలకు అడ్డుకట్ట వేసి, సరైన పంపిణీ జరిగేలా చూస్తున్న పోలీసుల చర్యను మరికొందరు ప్రశంసించారు.